काठमाडौँ । आर्थिक वर्ष २०८१/८२ मा नेपालको वैदेशिक व्यापारघाटा १५ खर्ब २७ अर्ब पुगेको छ। भन्सार विभागले सार्वजनिक गरेको तथ्यांकअनुसार वैदेशिक व्यापार घाटा अघिल्लो आर्थिक वर्षको तुलनामा १ खर्बभन्दा बढीले वृद्धि भएको हो।
नेपालले वैदेशिक व्यापार घाटा २०८०/८१ मा १४ खर्ब ४० अर्ब व्यहोरेकोमा २०८१/८२ मा १५ खर्ब २७ अर्ब व्यापार घाटा व्यहोरेको छ। अघिल्लो वर्षको तुलनामा यो व्यापार घाटा ६ प्रतिशतले बढेको हो।
नेपालले खासगरी, भारत, चीनलगायतका देशहरुसँग ठूलो मात्रामा वैदेशिक व्यापारमा घाटा व्यहोर्दै आएको छ। परनिर्भरताले सीमा नाघ्दा सियोदेखि सुनसम्म नेपालले विदेशबाट आयात गर्दै आएको छ। नेपालले २०८१/८२ मा २० खर्ब ८ अर्बको वैदेशिक व्यापार गरेको थियो।
भन्सार विभागका अनुसार १८ खर्ब ४ अर्बको वस्तु आयात भएको छ। यो आयात अघिल्लो वर्षको तुलनामा १३.२५ प्रतिशतले बढेको छ। यस्तै, निर्यात वृद्धिले रेकर्ड तोडेको छ। २०८१/८२ मा नेपालले २ खर्ब ७७ अर्बको वस्तु निर्यात गरेको छ। यो निर्यात अघिल्लो आ.व.को तुलनामा ८१ दशमलव ८० प्रतिशतले बढी हो। अघिल्लो आ।व। २०८०/८१ मा १ खर्ब ५२ अर्बको मात्रै वस्तु निर्यात गरेको थियो।
प्रतिक्रिया