नयाँदिल्ली (एजेन्सी) कोरोना संक्रमण फैलिँदो क्रममा रहेको भारतमा लकडाउन खुकुलो हुनेवित्तिकै मदिरा पसलमा भीड लाग्ने गरेको छ । मदिरा पसल अघिको भीड नियन्त्रण गर्न भारतका कतिपय राज्यहरुले अतिरिक्त करको भार थपेका छन् ।
कतिपय भारतीय राज्यहरूले रक्सीमा उल्लेख्य रुपमा कर बढाइरहेको त्यहाँका सञ्चारमाध्यमहरुले जनाएका छन् । मानिसहरूको बढ्दो माग व्यवस्थापन गर्न र राजस्व संकलन बढाउने प्रयास गरिरहेका बेला ती राज्यहरूले रक्सीमा भारी कर वृद्धि गरेका हुन् ।
सबैभन्दा रोचक त राजधानी नयाँदिल्लीस्थित अरविन्द केजरीवाल सरकारले ७० प्रतिशत कर लगाएको छ । दिल्ली सरकारले विशेष कोरोना शुल्क भन्दै मंगलबारबाट रक्सीमा ७० प्रतिशत कर लगाएको हो ।
नयाँदिल्ली सहित आन्द्र प्रदेश र पश्चिम बंगाल राज्य सरकारले पनि करमा भारी वृद्धि गरेका छन् । यद्यपि, कर धेरै लगाइए पनि दिल्लीका रक्सी पसलहरूमा मानिसहरूको लामो लाइन लागेको छ र त्यहाँ प्रहरीले नियमन गरिरहेको जनाइएको छ ।
भारतमा मार्च २४ तारिखदेखि लकडाउन गरिएको छ र, त्यसयता पहिलोपटक सोमवार केही क्षेत्रमा रक्सी पसलहरू खुलेपछि अस्तव्यस्त दृश्यहरू देखिएको थियो र कतिपय ठाउँमा प्रहरीसँग झडपसम्म भएको थियो ।
ग्राहकहरूको भीड थाम्नै नसक्ने भएपछि केही पसलहरू केही घण्टामै बन्द भएका थिए । सामाजिक दूरी कायम गर्नुपर्ने नियमहरू पालना गराउन पनि निकै संघर्ष गर्नुपरेको थियो ।
प्रतिक्रिया