काठमाडौं । नेपालमा बिहान बेलुका नै भात खाने प्रचलन छ । छिमेकी मुलुक भारतसँग मिल्दोजुल्दो संस्कृति रहे पनि भारतीयले रोटी खाँदा नेपालीले भने भात नै खान्छन् ।
नेपालीको खानेबानीका विषयमा विभिन्न चर्चा परिचर्चा र आलोचना भइरहे पनि खानेबानीमा परिवर्तन आएको छैन । दुवै छाक भात खानु स्वास्थ्यका दृष्टिले राम्रो मान्न नसकिए पनि अन्य पौष्टिक पदार्थको अपर्याप्तताले नेपालीले भात खाने गरेको पाइन्छ ।
इन्टरनेसनल राइस रिसर्च इन्स्टिट्यूट (एईआरआरई) का अनुसार एक नेपालीले वर्षेनि झन्डै १३८ किलो चामल खपत गर्छन् ।
एआरआईका अनुसार हामी एशियामै धेरै चामल खपत गर्ने देशमा पर्छौँ ।
त्यसो त नेपालमा पहिले मकै, कोदो र फापर पनि खाने गरिन्थ्यो, अहिले त्यसको खपत घट्दो र चामलको खपत बढ्दो क्रममा छ । यसै कारण नेपालमा चामल आयात बढिरहेको छ ।
भन्सार विभागका अनुसार यो आर्थिक वर्षको पहिलो छ महिनामा भारतबाट ३० करोड केजी र अमेरिकाबाट सात लाख ३३ हजार केजी चामल नेपाल भित्रिएको छ।
नेपालमा खेती गरिने जमिनको करिब ४७ प्रतिशत क्षेत्रफलमा धानखेती हुन्छ । जीडीपीमा धानको उच्च योगदान रहे पनि नेपालीलाई पुग्नेगरी धान उत्पादन हुँदैन ।
कृषि विभागका अनुसार यो वर्ष ५६ लाख २१ हजार ७१० टन धान उत्पादन भएको छ ।
प्रतिक्रिया