काठमाडौं । नेपाल इन्फ्रास्ट्रक्चर बैंक (निफ्रा) को सेयर कारोबार पुनः सुचारु भए पनि सेयर मूल्य भने घट्दो क्रममा देखिएको छ ।
निफ्राको सेयरका लागि खरिदकर्ताको चाप रहेकाले मूल्य धेरै ओरालो लाग्ने अवस्था भने देखिँदैन । बुधबारको कारोबार समाप्ती हुने बेलासम्म निफ्राको सेयरका लागि डेढ लाख कित्ताभन्दा बढीका लागि खरिद आदेश छ भने करिब ५१ हजार कित्ता मात्र बिक्रीमा राखिएका छन् ।
यद्यपि, यो समाचार तयार पार्ने बेलासम्म निफ्राको सेयर मूल्य अघिल्लो दिनको तुलनामा ४७ रुपैयाँले घटेर ५४७ रुपैयाँ कायम भएको छ ।
कारोबार सुरु भएको दुई सातामा निफ्राको सेयर मूल्य तीब्र उतारचढावबीच ३४० रुपैयाँदेखि ६४२ रुपैयाँसम्म पुगिसकेको छ ।
सेयर बजारका जानकारहरुका अनुसार खरिदकर्ताको चाप रहेकाले यसको सेयर मूल्य अझै केही बढ्नसक्ने भएकाले बेच्न हतारिनु उचित हुँदैन ।
बुधबार प्राविधिक समस्या आएपछि नेप्सेले निफ्राको सेयर कारोबार स्थगित गरेको थियो । प्रणालीमा गडबढी आउँदा निफ्राको भाउ १०० प्रतिशत घटेको देखिएपछि सेयर कारोबार स्थगित गरिएको थियो ।
यसले समग्र नेप्से सूचकलाई पनि प्रभावित बनायो थियो । तर नेप्सेले समस्या समाधान गरी सूचक पनि सच्याएको थियो ।
प्रतिक्रिया