दक्षिण एसियाका शीर्ष १० सीईओहरूको सूचीमा नेपालका सञ्जय अग्रवाल

रमेश कोर्पका कार्यकारी निर्देशक सञ्जय अग्रवाल ‘दक्षिण एसियाका उत्कृष्ट १० सीईओहरूको सूचीमा छनौट भएका छन् ।

मोबाइल फोन आयात कर्ता संघ र नेपाल इटाली चेम्बर अफ कमर्स एण्ड इन्डस्ट्रीका उपाध्यक्ष समेत रहेका अग्रवाललाई ‘सीइओ इन्साइट्स एसिया’ म्याग्जीनले दक्षिण एसियाकै उत्कृष्ट सीईओहरूको सूचीमा छनौट गरेको हो ।

युवा उद्यमीका रुपमा परिचित अग्रवालले नेपालमा कलर्स, स्पाइस, एचटीसी, ब्ल्याकबेरी, जिओन, शाओमी लगायत विभिन्न राष्ट्रिय तथा अन्तर्राष्ट्रिय मोबाइल कम्पनीहरूको स्थापनामा महत्वपूर्ण भूमिका खेल्दै आएका छन् । उनले नेपालको कर्पोरेट क्षेत्रमा खेलेको असाधारण नेतृत्वदायी भूमिका र मोबाइल तथा प्रविधि क्षेत्रमा दिएको उल्लेखनीय योगदानलाई मध्यनजर गर्दै सीइओ इन्साइट्स एसियाले अग्रवाललाई सो सम्मान प्रदान गरेको हो ।

सीइओ इन्साइट्स एसियाले हरेक वर्ष दक्षिण एसियाका उच्च श्रेणीका १० सीईओहरूको सूची सार्वजनिक गर्ने गरेको छ । यस वर्षको सूचीमा नेपालबाट अग्रवालसहित आशिष शर्मा, अभिषेक घिमिरे र सूदीप आचार्य छनौट भएका हुन् ।