अयोध्यामा रामको मूर्ति बनाउन कालीगण्डकीको ढुंगा लगिँदै, कांग्रेस नेता निधिले गरे क्षमापूजा !

काठमाडौं । भारतको अयोध्यामा बनाउन लागिएको भगवान रामको मूर्तिका लागि नेपालको कालीगण्डकी नदीबाट शिला (ढुंगा) लगिने भएको छ । म्याग्दीको बेनीदेखि उत्तर गलेश्वरधाम क्षेत्रमा रहेको उक्त शिलाको आइतबार क्षमापूजा सम्पन्न गरिएको छ ।

पूर्वमन्त्री तथा नेपाली कांग्रेसका नेता विमलेन्द्र निधिलगायतले अयोध्या लैजान लागिएको शिलाको क्षमापूजा गरेका छन् ।

अयोध्यामा रामको मूर्ति बनाउन राम जन्मभूमि तीर्थक्षेत्र कार्यालयले कालीगण्डकीको शिला पठाउन जानकी मन्दिरलाई गत कात्तिक १९ मा पत्राचार गरेको थियो ।

संस्कृति, पर्यटन तथा नागरिक उड्डयन मन्त्रालयले जनकपुरधाम र अयोध्याधामबीच सांस्कृतिक सम्बन्धलाई प्रगाढ बनाउनका साथै नेपालको सांस्कृतिक उदारता एवं सांस्कृतिक पर्यटन प्रवर्द्धनमा टेवा पुग्ने भन्दै दुई थान शिला उपलब्ध गराउन मन्त्रिपरिषदमा प्रस्ताव लगेको थियो ।

मन्त्रिपरिषद् र गण्डकी प्रदेश सरकारको सहमतिपछि कालीगण्डकीमा शिला खोज्ने काम सुरु भएको थियो । गत साउन अन्तिम साता पूर्वउपप्रधानमन्त्री तथा कांग्रेस नेता निधि स्वयम् अयोध्याधाम पुगेर यसको पहल थालेका थिए ।