काठमाडौं । नेपाल राष्ट्र बैंकले अन्ततः भारतीय रुपैयाँ प्रयोगमा प्रतिबन्ध लगाएको छ । सरकारको निर्णय कार्यान्वयन गर्दै केन्द्रीय बैंकले यस्तो नीति लागू गरेको हो ।
नयाँ नीतिअनुसार अब भारतमा बाहेक अन्य मुलुकमा भारतीय मुद्रा लैजान वा अन्य मुलुकबाट नेपाल ल्याउन पनि प्रतिबन्ध लागेको छ ।
तर, यो निर्णयले नेपाली पर्यटन व्यवसाय भने निकै नै धरासायी हुने देखिन्छ । नेपालमा वार्षिक २ लाख भारतीय पर्यटक हवाई माध्यम हुँदै तथा त्यसको ४ गुणा बढी स्थलमार्गबाट आउने गरेका छन् ।
भारतीयहरुले नेपालमा प्रवेशाज्ञा नचाहिने तथा भारु चल्ने भएकैले नेपाल भ्रमणलाई सहज मान्ने गरे पनि केन्द्रीय बैंकको निर्णयले पर्यटन व्यवसायमा समस्या आउने देखिएको छ ।
नेपाल भ्रमण वर्ष २०२०सुरु हुनु ठिक एक वर्षअघि गरिएको यस्तो निर्णयले पर्यटन वर्षमा २० लाख पर्यटक ल्याउने योजना नै बिफल हुने पर्यटन व्यवसायीहरु बताउँछन् ।
यता राष्ट्र बैंकका विदेशी विनिमय व्यवस्थापन विभागका प्रमुख एवं कार्यकारी निर्देशक भीष्मराज ढुंगानाका अनुसार नेपाली नागरिकले भारतमा जाँदा मात्रै भारतीय मुद्रा प्रयोग गर्न सक्नेछन् ।
त्यसमा पनि भारु १०० र सोभन्दा कम दरका नोट तथा मुद्रा प्रचलित व्यवस्थाबमोजिम ल्याउन लैजान वा सटही गर्ने सकिने व्यवस्था गरिएको छ ।
यो व्यवस्थाले सीमा क्षेत्रका नेपालीसमेत प्रभावित हुनेछन् ।
प्रतिक्रिया