काठमाडौं । उपप्रधान तथा गृहमन्त्री रवि लामिछानेले जिम्मेवारी सम्हालेपछि भएको पहिलो बढुवा सिफारिसले उनको छवि थप धूमिल बनाएको छ ।
प्रहरी बढुवामा सबैभन्दा सिनियरलाई बाइपास गरेर प्रधानमन्त्री पुष्पकमल दाहाल र एमाले अध्यक्ष केपी ओलीका पूर्व पीएसओहरु बढुवाको सूचीमा राखेसँगै गृहमन्त्री रविको छवि धूमिल भएको हो ।
प्रहरी प्रशासनमा पहिलो नम्बरमा रहेकालाई एक÷दुई अंक तलमाथि गरेर भए पनि बढुवा गर्ने परम्परा रहेकोमा यसपटक भने सबैभन्दा सिनियर डीएसपी प्रदीपकुमार क्षेत्री बढुवामै परेनन् ।
केपी शर्मा ओलीका पूर्व पीएसओ सन्तोष तामाङ र पुष्पकमल दाहालका पूर्व पीएसओ भने बढुवाको सिफारिसमा परे ।
यसले प्रहरीमा राजनीतिकरण झनै मौलाएको र प्रहरी महानिरीक्षक वसन्तबहादुर कुँवर प्रचण्ड, ओली र लामिछानेको लाचार छायाँमात्र बनेको देखिन्छ ।
कुँवर प्रहरी प्रमुख बनेयता यसअघि वरियतालाई प्राथमिकता दिने गरिए पनि पहिलोपटक सिनियरलाई छुटाएर राजनीतिक गन्ध आउनेगरी ८ एसपी बढुवा सिफारिस गरिएको हो ।
एसपी बढुवा प्रकरणले गृहमन्त्री लामिछाने आफ्नो पहिलो पहिलो परीक्षामै चुकेका छन् भने यसबाट प्रहरी प्रशासनमा पनि निराशा पैदा भएको छ ।
प्रतिक्रिया