कोशी ब्यारेजका सबै ढोका खोलिए, तर भारत भन्छः पाँगो माटो बगाउन खोलिएको हो !

काठमाडौं । सप्तकोशी नदीको ब्यारेजमा अहिले सबै ५६ वटै ढोका खोलिएको छ । लगातारको वर्षाले सप्तकोशी नदीमा पानीको बहाव बढ्दै गएकाले सबै ढोका खोलिएको ब्यारेज प्रहरी चौकी कार्यालयका प्रमुख ईश्वर दाहालले जानकारी दिएका छन् ।

भारतीय पक्षले भने ब्यारेजमा पाँगो माटो भरिँदै गएपछि ब्यारेज नै भत्काउने अवस्था उत्पन्न भएकाले सबै ढोका खोलिएको जनाएको छ । अत्यधिक वर्षा र बाढीका कारण ब्यारेज नै भत्काउने अवस्था भएपछि सबै ढोका खोल्नुको विकल्प नभएको भारतीय अधिकारीहरुले जनाएका छन् ।

नदीमा पानी बढ्न थालेपछि एकपछि अर्को ढोका खोल्न ब्यारेजमा २४ सै घण्टा प्राविधिकसहितका कर्मचारी तैनाथ रहेको सहायक प्रहरी निरीक्षक दाहालले बताए । । नौ लाख क्यूसेक पानी बहने क्षमता रहेको ब्यारेजमा अहिले २ लाख ९० हजार क्यूसेक पानी बगिरहेको बताइएको छ । शनिबार ३ लाख १८ हजार ६५० क्यूसेक पानी बगिरहेको थियो ।

यो वर्ष सप्तकोशीमा २४ हजार क्यूसेक पानीबाट अहिले बढ्दै सो क्षमतामा बगिरहेको छ । एक दशकअघि ब्यारेजदेखि माथि सिरान पश्चिम कुशहामा बाँध फुटेको थियो ।

बाँध फुट्दा नेपाल र भारतमा थुप्रै जनधनको क्षति भएकाले अहिले कोशी ब्यारेज र बाँधलाई सुरक्षित राख्न प्राविधिकहरुले विशेष सतर्कता अपनाएका छन् । पुलको बिम छुन लाग्ने अवस्थामा पुलको ढोका खोल्ने गरेको बताइएको छ ।