काठमाडौं । प्रधानमन्त्री केपी शर्मा ओलीले अझै २ साता चुनौतीपूर्ण रहेको बताएका छन् । अहिले सरकारले काम गरिरहेको उल्लेख गर्दै दुई साता धैर्य गर्न उनले आग्रह गरे ।
मंगलबार देशवासीका नाउँमा सम्बोधन गर्दै प्रधानमन्त्री ओलीले यस्तो जानकारी गराएका हुन् । कोरोना संकट सुरु भएयता उनको यो दोस्रो सम्बोधन हो ।
हजारौं नेपाली घर फर्किए पनि क्वारेन्टाइनमा नबस्दा समस्या भएको उनले बताए । उनले लकडाउन सुरु भएपछि नेपाल–भारत सीमानजिक आएका नेपालीको भावनालाई बुझे पनि सीमा बन्द गर्नैपर्ने बाध्यता बुझिदिन उनले आग्रह गरेका छन् ।
निश्चिित अवधि पूरा गरेपछि स्वास्थ्य परीक्षण गरेपछि फर्काइने उनले बताए । यस्तै, विदेशमा रहेका नेपालीलाई धैर्य रहन उनले आग्रह गरे । विदेशमा नेपालीको मृत्यु भएकोप्रति उनले दुःख प्रकट गरे ।
आफूले विभिन्न मुलुकका प्रधानमन्त्रीसँग छलफल गरेको, राष्ट्रपतिले दूतावासमार्फत बुझेको र परराष्ट्रमन्त्रालयले समेत काम गरिरहेको उनको भनाइ छ ।
नेपालमा रहेका विदेशी नागरिकको आफूहरुले हेरचाह गरिरहेको र विदेशमा पनि नेपालीले त्यस्तै सुविधा पाउने उनको अपेक्षा छ ।
सात प्रदेशका १० परीक्षण केन्द्रबाट परीक्षण भइरहेको उनले जानकारी दिए । सातै प्रदेशमा पीपीई १०४८ सेट पूरा थान पठाइएको तथा गाउन र मास्क उपलब्ध गराइएको उनले जानकारी दिए ।
यस्तै, आर्थिक क्षेत्रलाई संकटमा पर्न नदिने उनले प्रतिवद्धता जनाए ।
प्रतिक्रिया