सुनको मूल्यमा नयाँ रेकर्ड, तोलाकै १ लाख १० हजार रुपैयाँ

आज नेपाली बजारमा सुनको मूल्यले नयाँ रेकर्ड कायम गरेको छ ।

नेपाल सुनचाँदी व्यवसायी महासंघका अनुसार आज छापावाल सुन प्रतितोला २९ सय रुपैयाँले बढेर १ लाख १० हजार रुपैयाँमा कारोबार भइरहेको छ ।

त्यस्तै, तेजावी सुनको मूल्य प्रतितोला १ लाख ९ हजार ५०० रुपैयाँ कायम भएको छ । यसअघि माघ १९ गते सुनको मूल्य १ लाख ७ हजार ५०० रुपैयाँ पुगेको थियो ।

महासंघका अनुसार आइतबार चाँदीको मूल्य पनि तोलामा ३५ रुपैयाँले बढेर १३ सय ४५ रुपैयाँमा किनबेच भइरहेको छ ।