आईसीपीको सेवा चुस्त बनाउन उद्योगमन्त्री रिजालको निर्देशन

उद्योग वाणिज्य तथा आपूर्तिमन्त्री रमेश रिजालले भैरहवास्थित एकीकृत भन्सार जाँच केन्द्र (आईसीपी) को काम प्रभावकारी बनाउन निर्देशन दिएका छन् ।

शनिबार भैरहवा स्थित एकीकृत भन्सार जाँच केन्द्र (आईसीपी) को अनुगमन तथा निरीक्षण गर्दैै मन्त्री रिजालले मातहतका कर्मचारीलाई आईसीपीको सेवा चुस्त दुरुस्त बनाउन कर्मचारीलाई निर्देशन दिएका हुन् ।

मन्त्री रिजालले आईसीपीको आवश्यक सुधार तथा व्यवस्थापनमा जोड दिन आग्रह गर्दै नीतिगत समस्या समाधान गर्न केहि समय लाग्ने बताएका थिए । तर, उनले नीतिगत बाहेकका समस्या समाधानमा आफ्नो साथ रहने पनि प्रतिवद्धता गरे ।

मन्त्री रिजालले शनिबार नै भैरहवा स्थित विशेष आर्थिक क्षेत्र (सेज) को पनि अनुगमन गरे । अनुगमनका क्रममा विशेष आर्थिक क्षेत्र प्राधिकरणका कार्यकारी निर्देशक डा.चण्डिका भट्टले रिजाललाई सेजको स्थलगत जानकारी दिदै समस्या समाधानको लागि आग्रह गरे ।

रिजालले अहिले सेजमा उद्योग स्थापना गर्दा उद्योगीलाई परिरहेको समस्या तत्काल हल गर्ने प्रतिवद्धता व्यक्त गरे ।

‘उद्योगीले उद्योग स्थापना गर्न अहिले लिजको लागि सरकारले तोकेको ६० रुपैयाँ प्रति स्क्वायर मिटर जग्गा मुल्यलाई घटाएर प्रति स्क्वायर ८ देखि १० रुपैयाँ सम्म बनाउन पहल गर्ने मन्त्री रिजालले स्पष्ट पार्नु भएको छ ।’ रिजालको सचिवालयले जनाएको छ ।

आईसीपी र सेजको अनुगमन पश्चात मन्त्री रिजालले भैरहवाका उद्योगी व्यवसायीहरु सँग भेटघाट गर्दै उनीहरुलाई उच्च मनोबलका साथ काम गर्न आग्रह गरेका छन् ।