काठमाडौं । संस्कृति, पर्यटन तथा नागरिक उड्डयन मन्त्रालयका तत्कालीन सचिव प्रेमकुमार राईलाई जोगाएर वाइडबडी जहाज खरिद प्रकरणमा अन्यलाई भने भ्रष्टाचार मुद्दा चलाइएको छ ।
राई अहिले अख्तियार दुरुपयोग अनुसन्धान आयोगमा प्रमुख आयुक्त छन् । आयोगले नै वाइडबडी खरीदमा भ्रष्टाचारको अनुसन्धान र विशेष अदालतमा मुद्दा दायर गरेको हो ।
अख्तियारले आफ्नै प्रमुख जोडिएको मुद्दामाथि गरेको अनुसन्धान आफैंमा प्राकृतिक न्यायको सिद्धान्त विपरीत देखिएको छ ।
राई २०७२ साल माघ १८ देखि २०७३ को भदौ २७ गतेसम्म पर्यटन मन्त्रलायको सचिव थिए । तत्कालीन सचिव राईले २०७३ वैशाख २ गते विमान खरिदका लागि उपसमिति गठन गरेका थिए ।
पर्यटन मन्त्रालयमा रहँदा उनले नेपाल वायु सेवा निगमको विनियमावली मिचेर वाइडबडी विमान खरिद गर्न प्रक्रिया अगाडि बढाएको तत्कालीन संसदको सार्वजनिक लेखा समिति अन्तर्गतको उपसमितिले ठहर गरेको थियो ।
बिहीबार अख्तियारले दायर गरेको मुद्दामा तत्कालीन पर्यटनमन्त्री जीवनबहादुर शाही, सचिव शंकर अधिकारी, नेपाल वायुसेवा निगमका महाप्रवन्धक सुगतरत्न कंसाकारलगायतलाई विपक्षी बनाइएको छ ।
अख्तियारले वाइडबडीमा १ अर्ब ४७ करोड भ्रष्टाचार भएको आरोप लगाएको छ , जसमा ३२ जना प्रतिवादी बनाइए पनि राईको नाम छैन ।
प्रतिक्रिया