काठमाडौं । मुलुकको व्यापारघाटा उच्च हुनुमा पेट्रोलियम पदार्थको बढ्दो आयाातमात्र जिम्मेवार छैन, नेपालीको भान्सामा प्रयोग हुने वनस्पती तेलको योगदान पनि उत्तिकै छ ।
गत आर्थिक वर्षमा नेपालले १ खर्ब १५ अर्ब ५५ करोड ७९ लाख १५ हजार रुपैयाँ बराबरको सोयाबिन, पाम तथा सनफ्लावर आयलको कच्चा पदार्थ आयात गरेको छ भने यी वस्तुको निकासी ९३ अर्ब ६९ करोड ९६ लाख ६२ हजार रुपैयाँमा सीमित छ ।
सोयाबिन र सनफ्लावर आयल भान्सामा प्रयोग हुन्छ भने पाम आयल औद्योगिक कच्चा पदार्थका रुपमा उपयोग गरिन्छ । सोयाबिन र सनफ्लावर आयलको तुलनामा पाम आयलमा व्यापारघाटा कम छ ।
सोयाबिन आयलमा मात्र नेपालले गत आवमा ८ अर्ब ६ करोड व्यापारघाटा बेहोरेको छ ।
भन्सार विभागका अनुसार नेपालले गत आर्थिक वर्षमा ५६ अर्ब १८ करोड ३६ लाख रुपैयाँ बराबरको कच्चा सोयाबिन आयल आयात गरी ४८ अर्ब १२ करोड ४ लाख रुपैयाँको प्रशोधित तेल निकासी गरेको छ ।
यस्तै, सनफ्लावर आयलमा व्यापारघाटा १४ अर्ब १२ करोड रुपैयाँ रहेको छ । गत आवमा सनफ्लावर आयलको कच्चा पदार्थ तथा तयारी तेल आयात १८ अर्ब ६४करोड ५३ लाख रहेको छ भने निकासी मूल्य ४ अर्ब ५२ करोड ३४ लाख रुपैयाँ मात्र रहेको छ ।
औद्योगिक कच्चा पदार्थ पाम आयलको व्यापार घाटा १३ करोडमात्र रहेको छ । नेपालले ४१ अर्ब १९ करोड ३४ लाख रुपैयाँ बराबरको कच्चा पाम आयल आयात गरी ४१ अर्ब ६ करोड ४७ लाख रुपैयाँ बराबरको निकासी गरेको छ ।
कूल निर्यातमा सोयाबिन आयल, पाम आयल तथा सनफ्लावरको हिस्सा ४६.८४ प्रतिशत रहेको छ ।
प्रतिक्रिया