काठमाडौं । प्रधानमन्त्री शेरबहादुर देउवाको परराष्ट्र मामिला सल्लाहकारमा विश्लेषक तथा व्यवसायी अरुणकुमार सुवेदी नियुक्त भएका छन् ।
सुवेदीको परिचय राजनीतिक विश्लेषकका रुपमा रहे पनि उनी व्यवसायी हुन् । प्रत्यक्ष रुपमा उनको ठूलो व्यवसाय नभए पनि नेपालका ठूला घराना तथा विदेशी कम्पनीको एजेन्टका रुपमा उनले काम गर्दै आएका छन् ।
सुवेदी मुक्तिनाथ केबलकार नामक पोखरादेखि मुस्ताङसम्म केबलकार सञ्चालन गर्ने परियोजनाका सञ्चालक समेत हुन् । यो परियोजनाका सम्बन्धमा विवाद छ ।
मुक्तिनाथ दर्शन प्रालिले कास्कीको नयाँपुल–वीरेठाँटीदेखि मुस्ताङको मुक्तिनाथ जोड्ने ८३.६५ किलोमिटर लामो केबलकार आयोजनाका लागि अनुमतिको पर्खाइमा छ । प्रालिले वीरेठाँटीदेखि मुक्तिनाथसम्म ६ वटा स्टेसन रहने जनाएको छ ।
सुवेदी प्रधानमन्त्री शेरबहादुर देउवानिकट हुन् । प्रधानमन्त्रीको दबाबमा उनलाई अनुमति दिन लागिएको भन्दै यसअघि विवाद थियो ।
नेपालको असंलग्न परराष्ट्र नीतिका सम्बन्धमा विवादास्पद अभिव्यक्ति दिँदै आएका सुवेदीको नियुक्तिले देउवा सरकार चुनावी मुखमा झन् अप्ठेरोमा पर्ने अनुमान गरिएको छ ।
प्रतिक्रिया