अहिलेको संकटबाट निकास दिनसके प्रधानमन्त्री ज्यू, यहाँलाई देशले सधैँ सम्झिरहने छः अञ्जन श्रेष्ठ

अञ्जन श्रेष्ठ
मुलुुकको अर्थतन्त्रको ८१.५५ प्रतिशत हिस्सा ओगट्ने र ८६ प्रतिशत रोजगार प्रदान गर्ने निजि क्षेत्र आजको कार्यक्रममा सहभागी छ । नेपालको आर्थिक परिदृश्य छर्लङ पार्ने यो जतिको प्रभावकारी मन्च अरु नहोला ।

जति भावना यहां व्यक्त भएका छन् तिनमा अहिलेको समस्या बोलिएको छ, हामी निजि क्षेत्रको पिडा पोखिएको छ र यो हाम्रो वेदना शत प्रतिशत यथार्थतामा आधारित छ । हाम्रो पिर मर्का र अफ्ट्यारो सुनेर हामी बाट आएका सुुझावलाई आत्मसात गर्दै तत्कालौ पाइला चाल्न हामी सम्माननीय प्रधानमन्त्रीज्यू समक्ष आग्रह गर्दछौ ।

हाम्रो अर्थतन्त्र गम्भीर संकटमा रहेको समयमा प्रधानमन्त्रीज्यूले देशलाई यस संकटबाट निकास दिन भयो भने इतिहासले यहाँलाइ सधै सम्झीरहने छ। यतिखेर अधिकांश नेपालीको दैनिकी कष्टकर हुंदै गएको सर्वबिधित नै छ, पछिल्लो एक वर्षमा अप्रत्यासित रुपले बढेको मुद्रास्फीति र आम्दानीमा आएको संकुचनका कारण उपभोग्य वस्तुहरूको बजार माग घट्दै गएको छ ।

अस्थिर वित्तीय वातावरण, गुणस्तरीय पूर्वाधारहरूको कमी, अनौपचारिक अर्थतन्त्रको बढोत्तरी, लगानीमा असजहता लगायतले गर्दा हामि साना, मझौला तथा ठूला व्यापार तथा उद्योग गर्नेहरुको उत्पादन लागत बढेको र आयातित बस्तु तथा सेवा संगको हाम्रो प्रतिस्पर्धी क्षमता घट्दै गएको छ । यसको नतिजा स्वरुप नेपाली अर्थतन्त्र यति बेला मन्द गतिमा चलेको छ ।

अहिले मुलुकमा काम गरी खाने वर्ग जुन प्रकारले उकुस मुुकुसको वातावरणमा छन् तिनलाई अलिकति पनि राहत दिने काम गर्ने सदासयता सरकारबाट भयो भने अर्थतन्त्र अगाडी बढ्न सक्छ ।

यतिखेर विश्व अर्थतन्त्र यतिखेर चौतर्फी दवावमा छ । यधपी, उचित नीतिगत निर्णय लिएका मुलुकहरु जस्तै, भारत, थाइल्यन्ड र बंगलादेशले आफ्नो अर्थतन्त्र चलायमान बनाइसके, अघिल्लो वर्ष यति बेला गम्भीर आर्थिक संकटमा रहेको श्रीलंका समेत आफ्नो अर्थतन्त्र लयमा फर्काउने क्रममा छ ।

उचित नीतिगत निर्णयका साथै संरचनागत सुधार गर्दै जाने हो भने, नेपालले पनि आर्थिक विकासमा बंगलादेश र भियतनामलाई भेट्न १० वर्ष पनि कुर्नुपर्दैन तर यसका लागि यहाँ उपस्थित हाम्रा नीतिनिर्माता, कर्मचारी प्रशासन र हामि निजी क्षेत्र पनि संरचनागत सुधारका लागि तयार रहनुपर्छ ।

मुलतः उत्पादन र बजारमुखी नीतिगत सुधार, प्रविधिको प्रयोग गर्दै औपचारिक अर्थतन्त्र सुदृढीकरण, संस्थागत तर्फको सुधार, निजी क्षेत्रका लागि वैदेशिक ऋण र लगानीमा सहजीकरण,पूर्वाधार विकासमा राज्यको ध्यान केन्द्रीत हुुुनुु पर्ने हाम्रो निश्कर्ष छ ।

अर्थतन्त्रलाइ चलायमान बनाउन, हाम्रो आन्तरिक बजार माग बढाउन र मूल्य घटाउनु पर्ने आजको चुनौती हो, यसको लागि हाम्रा आन्तरिक उत्पादन बढाउन पर्छ । हाम्रा कृषि योग्य भूमिहरुको सदुुपयोग गर्दै उत्पादनमा जोड दिनै पर्छ । यसमा सरकारको भूमिका मुख्य रुपमा रहन्छ ।सरकारले प्रदान गर्ने कृषि अनुदान, सहुलियत उत्पादन र उत्पादकत्व संग जोड्नु जरुरि देखिन्छ

हाम्रा साना, मझौला र ठुला उधोगको प्रतिस्पर्धी क्षमता बढाउन पर्याप्त नीतिगत र संरचनागत सुधार गर्न सकिएन भने हाम्रो अवस्था अझै खराब बन्दै जाने निश्चित छ । देश र अर्थतन्त्रको विस्तार र विकासका लागि उद्योग र आन्तरिक बजार अपरिहार्य हुन् भन्ने वास्तविकता हाम्रो सरकार र समाजले मनन गर्नुपर्छ र उद्यमीप्रतिको दृष्टिकोण पनि बदल्नुपर्छ ।

नेपाली अर्थतन्त्रले अत्यन्त सम्भावना बोकेको छ । भौगोलिक अवस्थिति, प्राकृतिक स्रोत, जनसंख्या लगायत हाम्रो अर्थतन्त्रका त्यस्ता सम्भावाना हुन् जसले हामी कहाँ पर्याप्त बैदेशिक लगानी, उपोभोक्ता र सेवाग्राही आकर्षित गर्न सक्छ ।

हाम्रो अर्थतन्त्र दिगो बनाउनका लागि, उत्पादन मुलक उधोगमा आधारित मूल्य शृंखलामा जोड दिनु आजको आवश्यकता हो । कृषि, जडिबुटी, उच्च मूल्यका कृषि उपज, उर्जा, हस्तकला, पर्यटन, नवपर्वर्तन र सूचना प्रविधिमा आधारित उधोगहरुमा आधारित क्षेत्रीय र बिश्वब्यापी मूल्य शृंखला अहिले पनि छन, तर यिनमा पर्याप्त नीतिगत संरक्षण र प्रोत्सहन हामीले पाउन सकेका छैनौ । आशा छ आज देखि हाम्रो ध्यान यी क्षेत्रमा केन्द्रित हुने छ । जसले हाम्रो निर्यात तर्फको प्रतिस्पपर्धी क्षमतापनि बढाउने छ ।

हाम्रा समस्याहरु कुनै एक निकायले मात्र समाधान गर्न सक्ने अवस्था छैन् । यिनको समाधानका लागि सरकार निजिक्षेत्र र नेपाली समाज सबैको सबको सहयोग र सहकार्य आवश्यक छ । यसको नेतृत्व सम्माननीय प्रधानमन्त्रीज्यूले गर्नुहुनेछ भन्ने अपेक्षा हामीले राखेका छौं ।

आज हामि प्रतक्ष्य मर्कामा परेका बिषयहरु, अस्तिर ब्याजदर, बढिरहेको पुँजीको लागत, कसिलो मौद्रिक नीति, निजी क्षेत्र लक्षित महंगा करका दरहरु, आवश्यकता भन्दा बढी कसिला नीतिगत प्रावधानहरु, नीतिगत अस्थिरता, बिजुलीको गुणस्तर, सडकको दुरावस्था लगायत हुन्, आशा छ, यो कार्यक्रम पछि हामी सबै यी समस्याको समाधान गर्दै अर्थतन्त्र सुध्रिढ गर्न एक जुट भएर लाग्ने छौं ।

नेपाल उद्योग वाणिज्य महासंघका वरिष्ठ उपाध्यक्ष अञ्जन श्रेष्ठले बिहीबार महासंघद्वारा आयोजित राष्ट्रिय आर्थिक बहसमा गर्नुभएको सम्बोधनको सम्पादित अंश