काठमाडौं । गैरआवासीय नेपाली संघ (एनआरएनए)को मुख्यालय यतिबेला नेकपा एमालेनिकट युथ फोर्सको कब्जामा रहेको अर्को पक्षले जनाएको छ ।
एनआरएनए निर्वाचनको परिणामपछि दुई प्रत्यासीले आफूलाई अध्यक्षको घोषणा गर्दै हिँडिरहेका बेला एमाले निकट युवासंघको लडाकु दस्ता युथ फोर्सले बालुवाटारस्थित एनआरएनए कार्यालय नियन्त्रणमा लिएको हो ।
मंगलबार एनआरएनए मुख्यालय पुगेका नेपाल पत्रकार महासंघ बेल्जियम शाखा अध्यक्ष ओम शर्मामाथि युथ फोर्सका कार्यकर्ताले कुटपिट गरेका छन् । शर्मा कार्यालयमा रिपोर्टिङका लागि पुगेका बेला एमाले नेता महेश बस्नेत र ‘विवादास्पद’ निर्वाचनपछि आफूलाई अध्यक्ष दावी गर्दै आएका बद्रि केसीबीच बैठक चलिरहेको थियो ।
घाइते शर्माका अनुसार एनआरएन कार्यालयमा युथ फोर्सका कार्यकर्ता देखेर उनले फोटो खिचेसँगै उनीमाथि भौतिक आक्रमण भएको थियो ।
आफूले खिचेको फोटो मोबाइल खोसेर डिलिट गरिएको तथा होहल्ला भएपछि बद्रि केसीले कार्यालय छाडेर हिँडेको उनको भनाइ छ ।
शर्माका अनुसार कार्यालयमा ५०/६० को संख्यामा युथ फोर्स तैनाथ गरिएका छन् ।
संघमा बद्री केसी र आरके शर्मा दुवैले आफूलाई अध्यक्ष दावी गरिरहेका छन् ।
प्रतिक्रिया