काठमाडौं । धरान उपमहानगरपालिकाका मेयर हर्क साम्पाङ बहुलठ्ठी निर्णय गर्न माहिर छन् । उनको कार्यशैली र व्यवहारले न विधि चिन्छ न व्यवहारिक निर्णय गर्छन् ।
आफ्नो निर्णयको बचाउमा उनी जस्तोसुकै तर्क गर्न पनि पछि पर्दैनन् ।
उपमेयरलाई छाडेर वडाध्यक्षलाई कार्यवाहक तोक्ने जस्ता मेयर साम्पाङका निर्णयलाई कसैले पनि गम्भीरतापूर्वक लिँदैनन् बरु हसीमजाकका रूपमा लिन्छन् ।
उनै बहुलट्टी मेयरको पदचाप पछ्याउँदैछन् काठमाडौंका बालेन्द्र शाह उर्फ बालेन।
मेयर बालेन्द्र शाह (बालेन) को सचिवालयले वडा नम्बर १७ का अध्यक्ष तथा महानगरका प्रवक्ता नवीन मानन्धरलाई स्पष्टीकरण सोधेको छ ।
बालेन नजिक रहेका काठमाडौं महानगरका नगर प्रहरी प्रमुख राजु पाण्डेलाई स्पष्टीकरण सोधिएलगत्तै मानन्धरलाई पनि सोधिएको छ ।
अभिव्यक्ति स्वतन्त्रताको सीमाभन्दा बाहिर रहेर व्यक्तिगत चरित्र हत्या, सामाजिक प्रतिष्ठामा गम्भीर आँच पुर्याउने कार्य गरेको भन्दै स्पष्टीकरण सोधिएको हो ।
मेयर बालेनले पाँच महिनादेखि कार्यपालिका बैठक बोलाउन सकेका छैनन् । २०८१ चैत १० गते कार्यपालिका माग गर्दै कांग्रेसबाट निर्वाचित सबै वडाध्यक्षहरुले बालेनलाई ज्ञापनपत्र बुझाएका थिए ।
मानन्धरलगायतका वडाध्यक्षहरुले प्रमुख प्रशासकीय अधिकृत सरोज गुरागाईंलाई कार्यालय प्रवेश गराउने क्रममा मुख्य भूमिका खेलेका थिए ।
वडाध्यक्षहरुले बालेनको एकल निर्णयले महानगर नचल्ने भन्दै विरोध गर्दै आएका छन् ।
यसअघि प्रमुख प्रशासकीय अधिकृत गुरागाईंले नगरप्रहरी प्रमुख राजुनाथ पाण्डेलाई स्पष्टीकरण सोधेका थिए ।
प्रतिक्रिया