काठमाडौं । नेपाली कांग्रेसले पार्टी काार्यालय अगाडिपट्टि रहेको १९ आना जग्गा खरिद गर्ने भएको छ । यसका लागि पार्टीले १३ करोड खर्चंदैछ ।
कांग्रेस केन्द्रीय कार्यालय भवन रहेको सानेपा ललितपुरको कार्यालय परिसरलाई अझ फराकिलो र थप व्यवस्थित बनाउने उद्देश्य साथ जग्गा खरिद गर्न लागिएको पार्टीका मुख्यसचिव कृष्णप्रसाद पौडेलले जानकारी दिए ।
उनका अनुसार कार्यालय अगाडीपट्टी रहेको १९ आना अर्थात एक रोपनी तीन आना तीन पैसा जग्गा र सोही जग्गामा बनेको तीन तले घर खरिद गर्ने निर्णय गरिएको हो ।
ललितपुर निवासी अमिरमान अमात्यको नाममा रहेको सो जग्गा र घर नेपाली कांग्रेस केन्द्रीय कार्यालयले खरिद गर्ने गरी असार ११ गते महामन्त्रीद्वय गगनकुमार थापा, विश्वप्रकाश शर्मा र कोषाध्यक्ष उमेश श्रेष्ठको उपस्थितिमा सम्झौता भएको छ ।
जग्गा धनीसँग १ वर्षभित्र पास गर्ने गरी ५० लाख रुपैयाँ बैना सहित सम्झौता भएको हो ।
मुख्यसचिव पौडेलका अनुसार निर्धारित १३ करोड रुपैयाँ, पार्टीको विभिन्न तहको लेबी एवं शुभेच्छुकहरूको सहयोग मार्फत सबैको अपनत्व गाँसेर चुक्ता गरिनेछ ।
प्रतिक्रिया