काठमाडौं । नेपाली बजारमा भारतीय तरकारीको दबदबा रहे पनि स्वदेशमै उत्पादित विषादीमुक्त तरकारीको भने विकसित मुलुकमा उच्च माग छ ।
मध्यपूर्वी मुलुक कतारमा नेपाली अर्गानिक तरकारीको निकासी पुनः सुचारु भएको छ । कोरोनाका कारण अवरुद्ध भएको तरकारी निकासी सुचारु भए पनि उच्च मागका कारण पुर्याउनै धौ धौ भएको यसमा संलग्न व्यवसायीहरु बताउँछन् ।
विगत चार वर्षदेखि एग्रिकल्चर नेपाल र हिमालयन सुपर भरस प्रालिले नेपालको मध्यपहाडी क्षेत्रमा उत्पादित तरकारी कतारी बजारसम्म पुर्याउने गरेका छन् ।
यी दुई कम्पनीले कतारी बजारमा तिते करेला, परबर, घिँरौला, रामतोरियाँ, बोडी, खुर्सानी लगायतका विभिन्न सिजनल तरकारीको निर्यात गर्दै आइरहेका छन् ।
तरकारी निर्यातको लजिस्टिक पाटोमा सहयोग गरिरहेको सेक्युर फ्रेट इन्टरनेशनल प्रालिका सञ्चालक ईश्वर गुरुङका अनुसार माग अनुसार दिनहुँ नेपालबाट तरकारी प्याकिङ गरी कतारी बजारमा निर्यात गरिन्छ ।
गुरुङका अनुसार निर्यात हुने तरकारी सिधै फर्मबाट संकलन गरि सरसफाई र प्याकिङ भएको २४ घण्टामा कतारी बजारमा पुर्याइन्छ । “अर्डर अनुसार हरेक दिन बिहान ७ बजे तरकारी संकलन, सरसफाई, ग्रेडिङ तथा प्याकेजिङ गरी २४ घण्टाभित्र कतारीे बजारमा पठाइन्छ,” गुरुङले भने ।
उनका अनुसार कोरोनाका कारण केही समय ठप्प भएको निर्यात बुधबारबाट पुनः सुचारु गरिएको हो । कोरोनापश्चात निर्यात भएको पहिलो दिनमा नै साढे दुई लाख रुपैयाँ बराबरको तरकारी बिक्री भएको उनले जानकारी दिए ।
कतारी बजारमा दिनहुँ लाखौँको नेपाली तरकारी निर्यात गरिए पनि अहिलेको अवस्थामा भने माग धान्न नै धौ धौ परेको गुरुङले बताए ।
कोरोनाका कारण केही समय निर्यात ठप्प भए पनि अहिले सामान्य अवस्था भएसँगै बजारमा नेपाली तरकारीको माग ह्वात्तै बढेको छ ।
“यो नेपाली कृषक र नेपाली अर्थतन्त्र दुवैको लागि खुसीको विषय पनि हो” उनले भने ।
प्रतिक्रिया